MIFER ဆောင်ရွက်ချက်များ

MIFER ဆောင်ရွက်ချက်များ

ဝန်ကြီးဌာန ဖွဲ့စည်း တည်ထောင်ခြင်း ပထမအကြိမ် နှစ်ပတ်လည်နေ့ အထိမ်းအမှတ်နှင့် နှစ်သစ်ကူး အကြို ညစာစားပွဲကျင်းပ

ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၏ ဝန်ကြီးဌာန ဖွဲ့စည်း တည်ထောင်ခြင်း ပထမအကြိမ် နှစ်ပတ်လည်နေ့ အထိမ်းအမှတ် နှင့် နှစ်သစ်ကူး အကြို ဝန်ထမ်းများ ညစာစားပွဲ အခမ်းအနားကို ၂၀၁၉ ခုနှစ် ဒီဇင်ဘာလ ၃၀ ရက် ညနေပိုင်းတွင် ရင်းနှီးမြှုပ်နှံမှုနှင့် နိုင်ငံခြားစီးပွား ဆက်သွယ်ရေးဝန်ကြီးဌာန၊ ရုံးအမှတ် - ၁ ၌ ကျင်းပ ပြုလုပ်ခဲ့ပါသည်။

အခမ်းအနားကို ပြည်ထောင်စုဝန်ကြီး ဦးသောင်းထွန်းမှ အမှာစကားပြောကြား ဖွင့်လှစ်ခဲ့ ပါသည်။ ထိုသို့ပြောကြားရာတွင်  -

  • ဝန်ကြီးဌာနအနေဖြင့် ရင်းနှီးမြှုပ်နှံမှု ဝန်းကျင်ကောင်းများ ဖြစ်ပေါ်စေရေး၊ နိုင်ငံတကာနှင့် စီးပွားရေးဆိုင်ရာပူးပေါင်း ဆောင်ရွက်မှုကို ပိုမို ထိရောက်စွာ ဆောင်ရွက်နိုင်ရေး ကိစ္စတွေမှာ အကောင်အထည်ဖော်ဆောင်ရွက်နေပါကြောင်း၊
  • ရင်းနှီးမြှုပ်နှံမှုနှင့် ပတ်သက်၍ ဝန်ကြီးဌာန၏ တစ်နှစ်တာ ကာလအတွင်း ဘဏ္ဍာရေးနှစ် တစ်နှစ်တွင် အမေရိကန်ဒေါ်လာ ၄.၅ ဘီလီယံရှိပြီး ယခု ဘဏ္ဍာနှစ် ပထမသုံးလမှာ အမေရိကန်ဒေါ်လာ ၁ ဘီလီယံ ရှိခဲ့ပါကြောင်း၊
  • အလုပ်အကိုင်ဖန်တီးပေးနိုင်မှုအနေဖြင့် ၂၀၁၇-၂၀၁၈ ဘဏ္ဍာနှစ်တွင် ၈၃,၉၈၄ ခု ဖန်တီးပေးနိုင်ပြီး ၂၀၁၈-၂၀၁၉  ဘဏ္ဍာနှစ်မှာ ၁၇၀,၃၃၀ ခု ဖန်တီးပေးနိုင်ခဲ့တဲ့ အတွက် နှိုင်းယှဉ်ကြည့်ပါက ၁၀၃%  ခန့် တိုးတက်ခဲ့ပါကြောင်း၊
  • ကမ္ဘာ့ဘဏ် ထုတ်ပြန်ခဲ့တဲ့ ၂၀၂၀ ပြည့်နှစ်အတွက် Ease of Doing Business Report မှာ မြန်မာနိုင်ငံဟာ ယခင်နှစ်က အဆင့် ၁၇၁ ရှိခဲ့ရာမှ အဆင့် ၁၆၅ အဖြစ် သတ်မှတ်ခံခဲ့ရပြီး အဆင့် ၆ ဆင့် တိုးတက်ခဲ့ပါကြောင်း၊  
  • နှစ်နိုင်ငံ ပူးပေါင်းဆောင်ရွက်မှုအနေဖြင့် ဒီနှစ်အောက်တိုဘာလထဲမှာ ကိုရီးယား သမ္မတနိုင်ငံရဲ့ Economic Development Cooperation Fund (EDCF) က အတိုးနှုန်း ၀.၀၁ ရာခိုင်နှုန်းနဲ့ နှစ် ၄၀ ချေးငွေရယူခဲ့ပြီး ဖြစ်ပါကြောင်း၊ 
  • မိတ်ဖက်အဖွဲ့အစည်းများနှင့် အလှူရှင်နိုင်ငံများ ပူးပေါင်းဆောင်ရွက်မှု အားကောင်း လာစေရန် ရည်ရွယ်၍ ၂၀၁၉ ခုနှစ် ဒီဇင်ဘာလ ၄ ရက်နေ့မှ ၅ ရက်နေ့တို့တွင် နေပြည်တော်၌ 2nd Myanmar Development Effectiveness Roundtable ကိုလည်း ကျင်းပနိုင်ခဲ့ ပါကြောင်း၊
  • ဝန်ထမ်းများအားလုံးအနေဖြင့် ဝန်ကြီး ဌာနကြီး အောင်မြင်အောင် အတူတကွ ဆက်လက် ကြိုးပမ်းဆောင်ရွက်သွားကြပါလို့ တိုက်တွန်းလိုပါကြောင်း ပြောကြားခဲ့ပါသည်။ 

ထို့နောက် ဒုတိယဝန်ကြီး ဦးဗရတ်ဆင်း မှ သင်တန်းထူးချွန်ဆုရရှိသည့် ဝန်ထမ်းများကို ဆုချီးမြှင့်ခဲ့ပါသည်။ ဆက်လက်၍ ပြည်ထောင်စုဝန်ကြီး၊ ဒုတိယဝန်ကြီးနှင့် ဝန်ထမ်း အကြီးအကဲများက ဝန်ကြီးဌာနဝန်ထမ်းများနှင့်အတူ ညစာသုံးဆောင်ကြပြီး၊ ဝန်ထမ်းများ၏ ဖျော်ဖြေရေးအစီအစဉ်ကို ဆက်လက်တင်ဆက်ခဲ့ပါသည်။