နေပြည်တော်၊ ဇွန်လ ၂၃ ရက်

ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ ပြည်ထောင်စုဝန်ကြီး ဦး‌သောင်းထွန်းသည် ယနေ့နံနက် ၇ နာရီခွဲတွင် video conferencing စနစ်ဖြင့် ကျင်းပသည့် ဒေသတွင်းဘက်စုံစီးပွားရေး ပူးပေါင်းဆောင်ရွက်မှု (Regional Comprehensive Economic Partnership – RCEP) ဝန်ကြီးများ၏ (၁၀) ကြိမ်မြောက် ကြားဖြတ်အစည်းအဝေးသို့ ပါဝင် တက်ရောက်ဆွေးနွေးပါသည်။

အစည်းအဝေးတွင် ဗီယက်နမ်နိုင်ငံ၊ စက်မှုနှင့်ကုန်သွယ်ရေးဝန်ကြီး H.E. Mr. Tran Tuan Anh က သဘာပတိအဖြစ် ဆောင်ရွက်ပြီး ကိုရီးယားသမ္မတနိုင်ငံ၊ ကုန်သွယ်ရေး၊ စက်မှုနှင့် စွမ်းအင်ဝန်ကြီး H.E. Ms. Myung Hee Yoo က ပူးတွဲသဘာပတိအဖြစ် ဆောင်ရွက်ပါသည်။ အဆိုပါ အစည်းအဝေးသို့ အာဆီယံအဖွဲ့ဝင် (၁၀) နိုင်ငံမှ စီးပွားရေးဝန်ကြီးများ၊ အာဆီယံ၏ ဆွေးနွေးဖက်နိုင်ငံများဖြစ်ကြသော ကိုရီးယား၊ ဂျပန်၊ တရုတ်၊ ဩစတြေးလျနှင့် နယူးဇီလန် နိုင်ငံတို့မှ စီးပွားရေးဝန်ကြီးများနှင့် အာဆီယံအတွင်းရေးမှူးချုပ်တို့ ပါဝင်တက်ရောက်ပါသည်။

အစည်းအဝေး၌ ဝန်ကြီးများက ၂၀၁၉ ခုနှစ် နိုဝင်ဘာလ ၄ ရက်နေ့တွင် ကျင်းပခဲ့သည့် တတိယအကြိမ် RCEP ထိပ်သီးအစည်းအဝေးတွင် နိုင်ငံ့ခေါင်းဆောင်များ၏ လမ်းညွှန်ချက် အတိုင်း ဒေသတွင်းဘက်စုံစီးပွားရေး ပူးပေါင်းဆောင်ရွက်မှု သဘောတူစာချုပ်ကို ၂၀၂၀ ပြည့်နှစ် တွင် လက်မှတ်ရေးထိုးရန် ကတိကဝတ်ကို ထပ်လောင်းအတည်ပြုကြပါသည်။

ဆက်လက်၍ ဒေသတွင်းဘက်စုံစီးပွားရေး ပူးပေါင်းဆောင်ရွက်မှု ကုန်သွယ်ရေးညှိနှိုင်းမှု ကော်မတီဥက္ကဋ္ဌက RCEP သဘောတူစာချုပ်ကို ၂၀၂၀ ပြည့်နှစ်တွင် လက်မှတ်ရေးထိုးနိုင်ရေး အတွက် ညှိနှိုင်းပြီးစီးမှုအခြေအနေများကို ဝန်ကြီးများထံ တင်ပြရာတွင် ကုန်သွယ်ရေးညှိနှိုင်းမှု ကော်မတီ အစည်းအဝေးများ ကျင်းပပြုလုပ်ခဲ့မှုနှင့် ဖြစ်ပေါ်တိုးတက်မှု အခြေအနေများ၊ ညှိနှိုင်းရန် ကျန်ရှိသည့် ကိစ္စရပ်များကို ဝန်ကြီးများထံသို့ တင်ပြ၍ လမ်းညွှန်မှုခံယူပါသည်။ ဝန်ကြီးများက တင်ပြသောအစီရင်ခံစာကို မှတ်တမ်းတင်ခြင်း၊ ညှိနှိုင်းရန် ကျန်ရှိနေသောကိစ္စ များအပေါ် ဆွေးနွေးလမ်းညွှန်ခြင်းနှင့် ဆက်လက် လုပ်ဆောင်ရန် ကျန်ရှိသည့်ကိစ္စရပ်များ အတွက် ကုန်သွယ်ရေးညှိနှိုင်းမှုကော်မတီသို့ တာဝန် ပေးအပ်ခြင်းတို့ ဆောင်ရွက်ပါသည်။

အစည်းအဝေးတွင် ပြည်ထောင်စုဝန်ကြီးက ဒေသတွင်းဘက်စုံ စီးပွားရေးပူးပေါင်း ဆောင်ရွက်မှု သဘောတူစာချုပ်ကို ၂၀၂၀ ပြည့်နှစ်တွင် လက်မှတ်ရေးထိုးရန် မြန်မာနိုင်ငံ၏ ကတိကဝတ်ကို ထပ်လောင်းအတည်ပြုပြီး ကမ္ဘာ့ကပ်ရောဂါ COVID-19 ဖြစ်ပွားနေစဉ်ကာလ အတွင်း Virtual အစည်းအဝေးများ စဉ်ဆက်မပြတ်ပြုလုပ်၍ သိသာထင်ရှားသော ရလဒ်များ ရရှိအောင် ညှိနှိုင်းမှုများ ဆောင်ရွက်ပေးခဲ့သည့် ကုန်သွယ်ရေးညှိနှိုင်းမှုကော်မတီနှင့် လုပ်ငန်း အဖွဲ့များအား ချီးကျူးပါကြောင်း၊ COVID-19 ကြောင့် ကမ္ဘာ့စီးပွားရေး၌ စိန်ခေါ်မှုများ ရှိနေချိန်တွင် RCEP သဘောတူစာချုပ်ကို အပြီးသတ်နိုင်ရေးသည် အရေးကြီးပါကြောင်း၊ RCEP ကို လက်မှတ်ရေးထိုးခြင်းသည် ကမ္ဘာ့စည်းမျဉ်းအခြေခံသော နိုင်ငံစုံကုန်သွယ်မှုစနစ်ကို ဆက်လက် ထိန်းသိမ်း၍ ခိုင်မာအားကောင်းသော ဒေသတွင်းပူးပေါင်းဆောင်ရွက်မှု ကတိကဝတ်ကို ထင်ဟပ် စေမည် ဖြစ်ကြောင်း၊ ညှိနှိုင်းရန် ကျန်ရှိနေသော ကိစ္စရပ်များကို အချိန်မီ ပြီးစီးအောင် အတတ်နိုင်ဆုံး ဖြေလျှော့မှုများပေး၍ အပြန်အလှန်နားလည်မှုကို အခြေခံပြီး ညှိနှိုင်း ဆောင်ရွက်ရန် အဖွဲ့ဝင်နိုင်ငံများ အားလုံးကို တိုက်တွန်းလိုကြောင်း ဆွေးနွေးပြောကြား ပါသည်။

အစည်းအဝေးတွင် ဒေသတွင်းဘက်စုံစီးပွားရေး ပူးပေါင်းဆောင်ရွက်မှုဆိုင်ရာ ဝန်ကြီး များ၏ (၁၀) ကြိမ်မြောက် ကြားဖြတ်ညှိနှိုင်းအစည်းအဝေး ပူးတွဲကြေညာချက်ကို ဝန်ကြီးများက အတည်ပြုပါသည်။

အဆိုပါအစည်းအဝေးသို့ ပြည်ထောင်စုဝန်ကြီးနှင့်အတူ နိုင်ငံခြားစီးပွား ဆက်သွယ်ရေး ဦးစီးဌာန၊ ညွှန်ကြားရေးမှူးချုပ်၊ မြန်မာ RCEP ကုန်သွယ်ရေးညှိနှိုင်းမှုကော်မတီအဖွဲ့ ခေါင်းဆောင် ဉီးသန်းအောင်ကျော်နှင့် တာဝန်ရှိသူများ ပါဝင်တက်ရောက်ကြသည်။