ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၏ ၂၀၂၄ - ၂၀၂၅ ဘဏ္ဍာနှစ် “ရင်းနှီးမြှုပ်နှံမှုနှင့် နိုင်ငံတကာစီးပွားရေးပူးပေါင်းဆောင်ရွက်မှုလုပ်ငန်းများပြန်လည်သုံးသပ်ခြင်း” အစည်းအဝေးကို ယနေ့နံနက်ပိုင်းတွင် နေပြည်တော်ရှိ ရင်းနှီးမြှုပ်နှံမှုနှင့် နိုင်ငံခြားစီးပွား ဆက်သွယ်ရေးဝန်ကြီးဌာန၊ အစည်းအဝေးခန်းမ၌ ကျင်းပခဲ့ရာ ပြည်ထောင်စုဝန်ကြီး ဒေါက်တာ ကံဇော် တက်ရောက်၍ အဖွင့်အမှာစကားပြောကြားသည်။

အဆိုပါ အစည်းအဝေးသို့ ဒုတိယဝန်ကြီး၊ ညွှန်ကြားရေးမှူးချုပ်များ၊ ဒုတိယအမြဲတမ်း    အတွင်းဝန်၊ ဒုတိယညွှန်ကြားရေးမှူးချုပ်များ၊ တိုင်းဒေသကြီး/ ပြည်နယ်ညွှန်ကြားရေးမှူးများနှင့် တာဝန်ရှိသူများ တက်ရောက်ကြသည်။

ပြည်ထောင်စုဝန်ကြီးက အဖွင့်အမှာစကားပြောကြားရာတွင် ယနေ့ အစည်းအဝေးသည်  ရင်းနှီးမြှုပ်နှံမှုနှင့် နိုင်ငံတကာစီးပွားရေးပူးပေါင်းဆောင်ရွက်မှုလုပ်ငန်းများကို ပြန်လည်သုံးသပ်ရန် ရည်ရွယ်ကျင်းပခြင်းဖြစ်ကြောင်း၊    မိမိတို့ဝန်ကြီးဌာနကို ရင်းနှီးမြှုပ်နှံမှုူနှင့် ကုမ္ပဏီများညွှန်ကြားမှု ဦးစီးဌာနနှင့် နိုင်ငံခြားစီးပွားဆက်သွယ်ရေးဦးစီးဌာနတို့ဖြင့် ဖွဲ့စည်းတည်ထောင်ထားကြောင်း၊  နှစ်စဉ်စီမံကိန်းများနှင့် ရင်းနှီးမြှုပ်နှံမှုအစီအစဉ်များကို စနစ်တကျဆောင်ရွက်ရန်လိုအပ်ကြောင်း၊ ရင်းနှီးမြှုပ်နှံမှုများနှင့်ပတ်သက်၍ တိုးတက်ဖြစ်ပေါ်လာမှုများရှိသကဲ့သို့ အခက်အခဲများကိုလည်း ရင်ဆိုင်ကြုံတွေ့ခဲ့ရပါကြောင်း၊ ရင်းနှီးမြှုပ်နှံမှုများကို နေပြည်တော်အပါအဝင် တိုင်းဒေသကြီး/ ပြည်နယ် ၁၅ ခု တို့တွင် ရင်းနှီးမြှုပ်နှံမှုပုံစံနှစ်မျိုးဖြစ်သော ဒေသတွင်းရင်းနှီးမြှုပ်နှံမှုနှင့် ဒေသ ပြင်ပမှ လာရောက်ရင်းနှီးမြှုပ်နှံမှုဟူ၍ရှိကြောင်း၊ ဒေသတွင်းရင်းနှီးမြှုပ်နှံမှုများကို ဒေသတွင်း ရင်းနှီးမြှုပ်နှံမှုကော်မတီ (Regional Investment Committee- RIC) က  စိစစ်ခွင့်ပြု ပေးလျက်ရှိ ကြောင်း၊ ဒေသတွင်းရင်းနှီးမြှုပ်နှံမှုလုပ်ငန်းများကို ဦးစားပေးလုပ်ဆောင်ရန်နှင့် မြန်မြန်ဆန်ဆန် အကောင်အထည်ဖော် ဆောင်ရွက်နိုင်ရန်လိုအပ်ကြောင်း၊ နိုင်ငံတော်စီမံအုပ်ချုပ်ရေးကောင်စီ သည် ရှေ့လုပ်ငန်းစဉ် (၅) ရပ်နှင့်  ဦးတည်ချက် (၉) ရပ်တို့ကို ချမှတ်လျက် လယ်ယာကဏ္ဍကို အခြေခံသော ဖွံ့ဖြိုးတိုးတက်ရေးကို ဆောင်ရွက်ရန်ဖြစ်ကြောင်း၊ လယ်ယာကိုအခြေခံသော စက်မှု လုပ်ငန်းများဖွံ့ဖြိုးတိုးတက်ရေးဆောင်ရွက်ရန်ဖြစ်ကြောင်း၊ လယ်ယာကဏ္ဍဖွံ့ဖြိုးတိုးတက်ရေး အတွက်  မျိုး၊ မြေ၊ ရေ၊ နည်း သည် အရေးကြီးပါကြောင်း၊  မျိုး၊ မြေ၊ ရေ၊ နည်း တို့ရရှိရေးအတွက် ရင်းနှီးမြှုပ်နှံမှုလိုအပ်ပါကြောင်း၊ ရင်းနှီးမြှုပ်နှံမှုဆိုင်ရာ စာရင်းဇယားများကို တိကျသေချာစွာ ကောက်ယူရန် လိုအပ်ကြောင်း၊ အငယ်စား၊ အသေးစားနှင့် အလတ်စား စက်မှုလုပ်ငန်းများ (MSMEs) များကိုအားပေးမြှင့်တင်ခြင်းသည် ပုဂ္ဂလိကရင်းနှီးမြှုပ်နှံမှုများ တိုးတက်လာပြီးဒေသတွင်း ရင်းနှီးမြှုပ်နှံမှုတိုးတက်ရေးကို အထောက်အကူပြုကြောင်း၊ နိုင်ငံခြားစီးပွားဆက်သွယ်ရေးနှင့် စပ်လျဉ်း၍ ဒေသတွင်းအဖွဲ့အစည်းများဖြစ်သော ASEAN ၊ GMS၊ ACMECS အဖွဲ့အစည်းများနှင့် ပူးပေါင်းဆောင်ရွက်လျက်ရှိပြီး နှစ်နိုင်ငံသဘောတူစာချုပ်များ လက်မှတ်ရေးထိုး၍ စီးပွားရေး ပူးပေါင်းဆောင်ရွက်မှုမြှင့်တင်ရေးကို ဆောင်ရွက်လျက်ရှိကြောင်း၊ နိုင်ငံခြားစီးပွား ဆက်သွယ်ရေး တွင်  မိမိတို့နှင့် စီးပွားရေးပူးပေါင်းဆောင်ရွက်မှုပြုလုပ်နေသော နိုင်ငံများအပြင် အလားအလာ ရှိသော နိုင်ငံများကိုပါထည့်သွင်းစဉ်းစား၍   စီးပွားရေးပူးပေါင်းဆောင်ရွက်မှုများ တိုးချဲ့နိုင်ရေးကို အစီအစဉ်(Plans) များချမှတ်၍ ဆောင်ရွက်ကြစေလိုကြောင်း၊  ကုန်သွယ်မှုနှင့် ရင်းနှီးမြှုပ်နှံမှု မြှင့်တင်ရေးအတွက် အာဆီယံဒေသတွင်းနိုင်ငံများသာမက ကမ္ဘာ့နိုင်ငံများတွင် ဈေးကွက်ရှာဖွေ ကြရန်နှင့်  အလားအလာရှိသော ရင်းနှီးမြှုပ်နှံသူနှင့် မိတ်ဖက်များကို ရှာဖွေကြရန် လိုအပ်ကြောင်း နှင့် နိုင်ငံတကာ စီးပွားရေး ပူးပေါင်းဆောင်ရွက်မှုလုပ်ငန်းနှင့် ရင်းနှီးမြှုပ်နှံမှုများကို စနစ်တကျ ပြန်လည်သုံးသပ်ဆောင်ရွက်ကြစေလိုကြောင်း ပြောကြားခဲ့ပါသည်။

ထို့နောက် ဒုတိယဝန်ကြီးက မိမိတို့ဝန်ကြီးဌာန၏ ဆောင်ပုဒ်ဖြစ်သော “ရင်းနှီးမြှုပ်နှံ ပြည်အားမာန် ၊ ဆက်သွယ်စီးပွားပြည်စွမ်းအား” ဆိုသည့်အတိုင်း ရင်းနှီးမြှုပ်နှံမှုလုပ်ငန်းများသည် အရေးကြီးပါကြောင်း၊ နိုင်ငံခြားရင်းနှီးမြှုပ်နှံမှုများထက် ပြည်တွင်းရင်းနှီးမြှုပ်နှံမှုများကို အလေးထား ဆောင်ရွက်ကြစေလိုကြောင်း၊ အမျိုးသားအကျိုးစီးပွားကိုဦးထိပ်ထားပြီး ပြည်တွင်း/ ပြည်ပ ရင်းနှီး မြှုပ်နှံမြှင့်တင်ရေးကို ဆောင်ရွက်ရမည်ဖြစ်ကြောင်း၊ ဝန်ကြီးဌာနအနေဖြင့် အမျိုးသားအကျိုး စီးပွားအတွက် ပြည်တွင်း/ ပြည်ပ အဖွဲ့အစည်းများနှင့် တံတားသဖွယ်ချိတ်ဆက်ပံ့ပိုး ဆောင်ရွက် ပြီး ဝန်ကြီးဌာန၏ ရည်မှန်းချက်များကို ရရှိအောင် ဆောင်ရွက်ရမည်ဖြစ်ကြောင်း၊ ပြည်တွင်း ရင်းနှီးမြှုပ်နှံမှုများ တိုးတက်ရေးကို ဆောင်ရွက်နေသည့်အချိန်တွင် ကိန်းဂဏန်း အချက်အလက် များ မှန်ကန်တိကျရန် အရေးကြီးကြောင်း၊ နှစ်နိုင်ငံနှင့် နိုင်ငံစုံစီးပွားရေး ပူးပေါင်း ဆောင်ရွက်မှု တိုးတက်ရေးအလေးထား ဆောင်ရွက်ကြရန်လိုအပ်ကြောင်းနှင့် ဝန်ထမ်းများအနေဖြင့် နိုင်ငံ့ စီပွားရေးအမြင်နှင့် ပထဝီနိုင်ငံ ရေးအမြင်များကို နားလည်သိရှိထားရန် လိုအပ်ကြောင်း ပြောကြား ခဲ့သည်။

ဆက်လက်၍ ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန၊ ညွှန်ကြားရေးမှူးချုပ်က ၂၀၂၄-၂၀၂၅ ဘဏ္ဍာနှစ်အတွင်း သတ်မှတ်ထားသော ဘဏ္ဍာငွေရရှိရေးကို ယခင်နှစ်များနည်းတူ ဆောင်ရွက်နိုင်ခဲ့ကြောင်း၊ ရင်းနှီးမြှုပ်နှံမှုလုပ်ငန်းများကို တစ်နှစ်ထက်တစ်နှစ် ပိုမိုလွယ်ကူ အဆင် ပြေအောင် ဆောင်ရွက်လျက်ရှိကြောင်း၊ ၂၀၂၆ ခုနှစ်တွင် ရင်းနှီးမြှုပ်နှံမှုများပိုမိုတိုးတက်လာရေးကို ရည်မှန်းချက်ထား ဆောင်ရွက်လျက်ရှိကြောင်း၊ စိုက်ပျိုးရေးကဏ္ဍတွင် စက်မှုချိတ်ဆက် ဆောင်ရွက် နိုင်မှု အခြေအနေများ၊ ရင်းနှီးမြှုပ်နှံမှုလုပ်ငန်းများနှင့်စပ်လျဉ်း၍ အခက်အခဲများနှင့် ဆက်လက် ဆောင်ရွက်မည့် လုပ်ငန်းစဉ်များအား တင်ပြဆွေးနွေးခဲ့ပါသည်။

ထို့နောက်  နိုင်ငံခြားစီးပွားဆက်သွယ်ရေးဦးစီးဌာန၊  ညွှန်ကြားရေးမှူးချုပ်က အာဆီယံ အပါ အဝင်  ဒေသတွင်းအဖွဲ့ အစည်းများတွင်  ပါဝင်ဆောင်ရွက်မှုူ၊ နှစ်နိုင်ငံစီးပွားရေး ပူးပေါင်းဆောင်ရွက်မှု နှင့် နိုင်ငံစုံပူးပေါင်း ဆောင်ရွက်မှုများ၊ ရုရှားနှင့် မြန်မာနိုင်ငံတို့အကြား ဆက်လက်ပူးပေါင်း ဆောင်ရွက်မည့် လုပ်ငန်းစဉ်များနှင့် ဒေသတွင်းဘက်စုံစီးပွားရေး ပူးပေါင်းဆောင်ရွက်မှု သဘောတူ စာချုပ်အတွက် အကောင်အထည်ဖော်ဆောင်ရွက်နိုင်မှုအခြေအနေများကို တင်ပြဆွေးနွေးခဲ့သည်။

ဆက်လက်၍ ဒုတိယအမြဲတမ်းအတွင်းဝန်က ဝန်ကြီးဌာန၏ ဆက်လက်ဆောင်ရွက်မည့် လုပ်ငန်းစဉ်များနှင့် ဆောင်ရွက်ပြီးစီးမှု အခြေအနေများကို ရှင်းလင်းတင်ပြခဲ့ပြီး  ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန၊ တိုင်းဒေသကြီး / ပြည်နယ်ညွှန်ကြားရေးမှူးများက တိုင်းဒေသ ကြီး / ပြည်နယ်များ၏ ကဏ္ဍအလိုက် ဆောင်ရွက်လျက်ရှိသော ရင်းနှီးမြှုပ်နှံမှု လုပ်ငန်းများနှင့် ရင်းနှီးမြှုပ်နှံမှုမျှော်မှန်းချက်အပေါ် အကောင်အထည်ဖော်ဆောင်ရွက်နိုင်မှု အခြေအနေများနှင့် စပ်လျဉ်း၍ ဆွေးနွေးတင်ပြခဲ့ကြသည်။

အစည်းအဝေး ဒုတိယနေ့ကို မတ်လ ၂၅ ရက်နေ့တွင် ဆက်လက်ကျင်းပသွားမည် ဖြစ်ကြောင်းသိရှိရပါသည်။