နေပြည်တော် ၊ ဇွန်လ ၄ ရက်

ရင်းနှီးမြှုပ်နှံမှုနှင့် နိုင်ငံခြား စီးပွားဆက်သွယ်ရေးဝန်ကြီးဌာန၊ ပြည်ထောင်စုဝန်ကြီး ဦး‌သောင်းထွန်းသည် video conferencing စနစ်ဖြင့် ယနေ့နံနက် ၉ နာရီခွဲတွင် ကျင်းပ သည့် COVID-19 ကူးစက်ရောဂါဆိုင်ရာ အာဆီယံစီးပွားရေးဝန်ကြီးများ အထူးအစည်း အဝေးနှင့် မွန်းလွဲ ၁ နာရီခွဲတွင် ကျင်းပသည့် အာဆီယံအပေါင်းသုံး  စီးပွားရေးဝန်ကြီးများ အထူး အစည်းအဝေးတို့သို့ ပါဝင် တက်ရောက် ဆွေးနွေးခဲ့သည်။

အာဆီယံစီးပွားရေးဝန်ကြီးများအထူးအစည်းအဝေးနှင့်  အာဆီယံအပေါင်းသုံး စီးပွားရေး ဝန်ကြီးများ အထူးအစည်းအဝေးတို့တွင် ဗီယက်နမ်နိုင်ငံ၊ စက်မှုနှင့်ကုန်သွယ်ရေးဝန်ကြီး H.E. Mr. Tran Tuan Anh က အစည်းအဝေး သဘာပတိအဖြစ် ဆောင်ရွက်သည်။ အာဆီယံ စီးပွားရေးဝန်ကြီးများအထူးအစည်းအဝေးသို့ အာဆီယံအဖွဲ့ဝင်နိုင်ငံများမှ စီးပွားရေးဝန်ကြီး များနှင့် အာဆီယံအတွင်းရေးမှူးချုပ်တို့ အပြင် အာဆီယံစီးပွားရေး အကြံပေးကောင်စီမှ ကိုယ်စားလှယ်များ ပါဝင်တက်ရောက်သည်။  အာဆီယံအပေါင်းသုံး စီးပွားရေးဝန်ကြီးများ အထူးအစည်းအဝေးသို့ အာဆီယံ စီးပွားရေးဝန်ကြီးများနှင့် အပေါင်းသုံးနိုင်ငံများ ဖြစ်သည့်  တရုတ်၊ ဂျပန်၊ တောင်ကိုရီးယားနိုင်ငံများမှ စီးပွားရေးဝန်ကြီးများနှင့် အာဆီယံ အတွင်းရေးမှူးချုပ်တို့ ပါဝင်တက်ရောက်ခဲ့သည်။

နံနက်ပိုင်းတွင် ကျင်းပသည့် အာဆီယံစီးပွားရေးဝန်ကြီးများ အထူးအစည်းအဝေး၏ ပထမပိုင်းအစီအစဉ်အဖြစ် အာဆီယံစီးပွားရေး အကြံပေးကောင်စီနှင့် မိတ်ဖက်စီးပွားရေး ကဏ္ဍ အဖွဲ့အစည်းများက တင်ပြသည့် ပူးတွဲ ကြေညာချက် COVID-19 in ASEAN: A call for action on dealing with the crisis in post-pandemic economic recovery အပေါ် ဝန်ကြီးများက ဆွေးနွေးအကြံပြုခဲ့ကြသည်။   

အစည်းအဝေး၏ ဒုတိယပိုင်းအစီအစဉ်အဖြစ် အာဆီယံစီးပွားရေးဝန်ကြီးများ အထူးအစည်းအဝေးကို ဆက်လက် ကျင်းပခဲ့ရာဝန်ကြီးများက မိမိတို့နိုင်ငံအလိုက် COVID-19 ကမ္ဘာ့ကူးစက်ရောဂါ ကာကွယ်၊ထိန်းချုပ်၊ ကုသရေးနှင့် ထိခိုက်သည့် စီးပွားရေး ကဏ္ဍများ အပေါ် ကုစားသည့်အစီအစဉ်များကို ဆွေးနွေးအမြင်ချင်း ဖလှယ်ခဲ့ကြပြီး၊ အာဆီယံနိုင်ငံ များအကြား ကျန်းမာရေးနှင့် လူမှု-စီးပွားရေး ကဏ္ဍများ ပူးပေါင်းဆောင်ရွက်မည့် အစီအစဉ် များအားလည်း‌ကောင်း၊ ဒေသတွင်းထုတ်လုပ်မှု ကွင်းဆက်များ ခိုင်မာအားကောင်းစေရေး နှင့် ရင်းနှီးမြှုပ်နှံမှုနှင့် ကုန်သွယ်မှုများ ပိုမိုတိုးမြှင့်နိုင်ရေးအတွက် လည်းကောင်း၊  ကမ္ဘာ့ ကျန်းမာရေးအဖွဲ့အပါအဝင် နိုင်ငံတကာမိတ်ဖက် အဖွဲ့အစည်းများနှင့် ပူးပေါင်းဆောင်ရွက် ရေးကိစ္စရပ်များကိုလည်းကောင်း ဆွေးနွေးခဲ့ကြသည်။ အစည်းအဝေးတွင် စီးပွားရေးဝန်ကြီး များက ၂၀၂၀ ပြည့်နှစ် ဧပြီလ ၁၄ ရက်နေ့တွင် ကျင်းပခဲ့သည့် အာဆီယံ အထူးထိပ်သီး အစည်းအဝေးတွင် ခေါင်းဆောင်များ၏ လမ်းညွှန်ချက်များနှင့်အညီ ရေးဆွဲအကောင်အထည်ဖော်မည့်  ဟနွိုင်း‌ရှေ့လုပ်ငန်းစဉ် (Hanoi Plan of Action on Strengthening ASEAN Economic Cooperation and Supply Chain Connectivity in Response to the COVID-19 Pandemic) ကို အတည်ပြုခဲ့ကြသည်။

အဆိုပါ အစည်းအဝေးတွင် ပြည်ထောင်စုဝန်ကြီးက မြန်မာနိုင်ငံတွင် အစိုးရနှင့် ပြည်သူတစ်ရပ်လုံး၏ ပူးပေါင်းအား ဖြင့် ဆောင်ရွက်လျက်ရှိသည့် COVID-19 ကူးစက်ရောဂါ ကာကွယ်၊ ထိန်းချုပ်၊ ကုသရေးဆောင်ရွက်နေမှုများ၊ စီးပွားရေး ထိခိုက်မှုများကို ကုစား နိုင်ရန်အတွက် COVID-19  စီးပွားရေး ကုစားရေး အစီအစဉ်ကို ရေးဆွဲချမှတ်၍  နိုင်ငံတကာ မိတ်ဖက်အဖွဲ့အစည်းများနှင့် ပူးပေါင်းအကောင်အထည်ဖော် ဆောင်ရွက်နေမှု အခြေအနေ များကို ဆွေးနွေးခဲ့ပြီး၊ မြန်မာနိုင်ငံအနေဖြင့် COVID-19 နှင့် ပတ်သက်သည့် ဆေးဝါးများနှင့် ကျန်းမာရေး အထောက်အကူပြုပစ္စည်းများ တင်သွင်း၊ တင်ပို့မှုလုပ်ငန်းများနှင့် ဒေသတွင်း စားနပ်ရိက္ခာဖူလုံရေးအတွက် ထုတ်လုပ်မှုကွင်းဆက် ခိုင်မာချောမွေ့စေရေးအတွက် နိုင်ငံများ၊ အဖွဲ့အစည်းများနှင့် ပူးပေါင်းဆောင်ရွက်မှု အခြေအနေများကို ရှင်းလင်းဆွေးနွေး ခဲ့သည်။

မွန်းလွဲ ၁ နာရီခွဲတွင် အာဆီယံ အပေါင်းသုံး စီးပွားရေးဝန်ကြီးများ အထူးအစည်းအဝေးကို ဆက်လက်ကျင်းပခဲ့ရာ ဝန်ကြီးများက အာဆီယံအပေါင်းသုံး အထူးထိပ်သီး အစည်းအဝေး တွင် ခေါင်းဆောင်များ၏ ညွှန်ကြားချက်အတိုင်း COVID-19 ကြောင့် ဖြစ်ပွားသော စီးပွားရေးထိခိုက်မှုများကို လျှော့ချနိုင်ရေးအတွက် ဆက်လက် ပူးပေါင်း အကောင်အထည်ဖော်မည့် အစီအစဉ်များကို ဆွေးနွေးခဲ့ကြသည်။ ထိုသို့ဆွေးနွေးရာတွင် ကုန်သွယ်မှုနှင့် ရင်းနှီးမြှုပ်နှံမှု တိုးမြှင့်ရန်အတွက် ဒေသတွင်း စျေးကွက်ကို ဆက်လက် ဖွင့်လှစ်ထားရှိရန် အရေးကြီးမှု၊  ကုန်စည်နှင့် ဝန်ဆောင်မှုများ လွတ်လပ်စွာ စီးဆင်းနိုင်ရေး အတွက် အကောက်ခွန် မဟုတ်သည့် အတားအဆီးများ ဖယ်ရှားရန် လိုအပ်မှု၊ စီးပွားရေး လုပ်ငန်းရှင် များ ရွှေ့ပြောင်းသွားလာမှုအတွက် ကန့်သတ်ချက်များ ဖြေလျှော့ရန် လိုအပ်နေမှု အပါအဝင် အာဆီယံအပေါင်းသုံး အရေးပေါ်အရံဆန်ထားရှိဆောင်ရွက်မည့် အစီအစဉ်ကို အကျိုးရှိစွာ အသုံးပြုရေးအတွက် ဆွေးနွေးခဲ့ကြသည်။ ထို့အပြင် အငယ်စား၊ အသေးစား နှင့် အလတ်စား စီးပွားရေးလုပ်ငန်းများ အပါအဝင် စီးပွားရေးထိခိုက်မှု အများဆုံးခံစား ရသည့် ကဏ္ဍများကို ပံ့ပိုးပေးသည့် အစီအမံများကို လည်းကောင်း၊ ဒေသတွင်း ထုတ်လုပ်မှု ကွင်းဆက်များ ပိုမိုခိုင်မာစေရေးနှင့် COVID-19 နှင့်စပ်လျဉ်းသည့် စီးပွားရေးဆိုင်ရာ သတင်းအချက်အလက်များ ဖလှယ်ရေးတို့ကိုလည်းကောင်း  အလေးထား ဆွေးနွေးခဲ့ကြ သည်။  အစည်းအဝေးတွင် ဝန်ကြီးများက COVID-19 ကူးစက်ရောဂါကြောင့် ဖြစ်ပွားသော စီးပွားရေးထိခိုက်မှုများကို လျှော့ချနိုင်ရေး အာဆီယံအပေါင်းသုံး စီးပွားရေးဝန်ကြီးများ၏ ပူးတွဲကြေညာချက် (ASEAN Plus Three Economic Ministers’ Joint Statement on Mitigating the Economic Impact of the COVID-19) ကို အတည်ပြု ထုတ်ပြန်ခဲ့ပါသည်။

အဆိုပါ အစည်းအဝေးတွင် ပြည်ထောင်စုဝန်ကြီးက အာဆီယံနှင့် အပေါင်းသုံးနိုင်ငံ ခေါင်းဆောင်များ၏ လမ်းညွှန်ချက်အရ ထုတ်လုပ်မှု ကွင်းဆက်များ ဆက်လက်ဖွင့်လှစ် ထားရှိရန် လိုအပ်မှု၊ ဆေးဝါး၊ စားသောက်ကုန် များအပါအဝင် အရေးကြီး ကုန်စည်များ ကုန်သွယ်မှုတွင် လွယ်ကူချောမွေ့စေရေးဆောင်ရွက်မှုနှင့်  အရေးကြီး ကုန်စည်များအား ကမ္ဘာ့ကုန်သွယ်ရေး အဖွဲ့နှင့်နိုင်ငံတကာ စည်းမျဉ်းများနှင့်အညီ ကုန်စည်များ လွတ်လပ်စွာ စီးဆင်းရေး အတွက် အကောက်ခွန်မဟုတ်သည့် အတားအဆီးများ ဖယ်ရှားရေး ဆောင်ရွက် နေမှုများကို ရှင်းလင်း ဆွေးနွေးသည်။ ထို့အပြင် ရင်းနှီးမြှုပ်နှံမှု မြှင့်တင်နိုင်ရေး ဆောင်ရွက် မှုများ၊ ထိခိုက်မှု အများဆုံးခံစားရသည့် စီးပွားရေးကဏ္ဍများအတွက် လုပ်ငန်းများ ပြန်လည် လည်ပတ်နိုင်ရန်အတွက် အစိုးရ၏ ပံ့ပိုးဆောင်ရွက်မှုများ၊ ကူးစက်ရောဂါအလွန် စီးပွားရေး ပြန်လည်တိုးတက်ရေးဆောင်ရွက်မည့် အစီအမံများနှင့် ဒေသတွင်းနိုင်ငံများ၊ အဖွဲ့အစည်း များနှင့် COVID-19 ကာကွယ်ရေး၊ ကုသရေးနှင့် စီးပွားရေးပူးပေါင်း ဆောင်ရွက်မှုများ ကိုလည်း ဆွေးနွေးခဲ့သည်။

အဆိုပါအစည်းအဝေးများသို့ ပြည်ထောင်စုဝန်ကြီးနှင့်အတူ  နိုင်ငံခြားစီးပွား ဆက်သွယ်ရေးဦးစီးဌာန၊ ညွှန်ကြားရေးမှူးချုပ်၊ အာဆီယံ အဆင့်မြင့်စီးပွားရေးအရာရှိ ဉီးသန်းအောင်ကျော်နှင့် တာဝန်ရှိသူများ ပါဝင် တက်ရောက်ခဲ့ကြသည်။